福州人的时间哲学（福州话正字稿）
蜀遘假期卜结束其前后，朋友圈底势都会开始流传仂囝野[日行]都儥退时其笑话共图，大概意思都是各位小学生囫囵芘寒暑假都着[口礼]客佻欢喜，㑚有着开学其前蜀晡，悗啼悗做命赶假期作业，故会有蜀厝侬齐齐对手补救其。着我读小学其前后，也仈曾创造过蜀日写完囫囵本字帖其“光辉事迹”，㑚是讲野可惜，我妈伓对手我也就[䓴瓦]去，故着使出所有气力笑我：“日游游，暝点油。”
着真重其作业压力下底，我侬复细，复真好奇，听儥会意，就问依妈者话是世乇意思。依妈共我讲，嚽是讲蜀只侬日中四势客佻，暝晡油灯点[口礼]做夜班，一般掏来形容侬做事际真挨，“上轿缠骹”，讲其就是现在其我。 “快仂囝，莫做妮妮势。”依妈逐我，我面做[口礼]红丹丹，也无能耐应伊蜀芘字，㑚有继续努力补作业。
年龄慢慢大了，我做事际透底都真挨，复稠稠乞侬刺溪，故此也着长辈喙[口礼]学着福州话关于“拖延症”其世乇款都有其讲法。
卜想形容蜀只侬做事际真挨，就稠稠使“妮”或者“慒”。譬如讲长辈稠稠会评晚辈讲：“快仂囝，妮世乇！”或者讲“伊做事际尽慒，侬看[口礼]都会急！”意思就是做事际恰挨，让侬看[口礼]会急。我妈就爱告我“妮妮婆”，讲我是蜀只做事际真挨其侬，告我快共者问题改去。
爱挨其侬最后去俤所哩？大概都是着限期遘之前，掏出八倍其速度，效率野悬其完成任务，也就是一般讲其“上轿缠骹”。除起 “日游游，暝点油”，福州话底势故有“三十暝晡学拳头，初一早起头摊”其讲法。只蜀句俗语话底势其“拳头”就是讲武术、功夫，三十暝晡赶[口礼]去学功夫，就是为着初一早起头来表演，会使形容“正学正卖”，也会使形容“上轿缠脚”。
当然，对福州侬来讲，平常更更会听见其可能是“屎遘股川正会晓拉”。共翻译成普通话，其实就是所谓其“屎急挖茅厕”。只蜀句话复通俗，复有味，蜀只侬定虫遘无牧去，伓挨遘最后蜀分钟就伓振动其样式，使只蜀句话来讲就再适合儥过了。
讲遘底，侬家会使认为“上轿缠脚”其实就是对时间儥珍惜。故此，“拖延症”笑悗笑，福州话底势也有野価劝侬珍惜时间其俗语话。“茉莉花，赶头水”只蜀句话就很有福州特色。福州真会产茉莉花茶，熏茶箬使其茉莉花着敆头回花期采苞，者前后地肥，花苞饱满，香味第一浓。故此，福州侬也稠稠使嚽来比喻事际着做前斗，莫挨后斗去，提醒别侬逢事都着提早做准备。
除起珍惜时间，对时机其把握也真重要。“做塍无命，节气把定”讲其就是五谷栽会儥好，共字运无干过，把握做塍其时间正是关键。会使发现，只裏其俗语话真像都共塍[口礼]其劳动有干过，会使讲福州侬其时间观念共农耕文明是分儥开其。
受遘技术水平共认知程度其限制，古代劳动人民㑚有着蜀日复蜀日、蜀年复蜀年其劳动底势共自然深入交流，慢慢讨着最普遍其农业生产规律，共只裏浓缩成蜀句复蜀句方言俗语话，蜀代接蜀代，蜀只讲蜀只记，使遘今旦。
侬家共日历翻遘2023年，科技发展已经大大提悬农业对抗天灾风险其能力，仱由本质悬顶来讲，人类故是着遵守自然演变共交替规律其基础悬顶尽最大其努力。嚽也更更证明蜀芘道理——总款蜀种由农耕文明脱胎、强调珍惜时光共把握时机其“时间哲学”，遘今旦故是有历久弥新其积极意义共深刻其存在价值。