福州话谈情说爱(福州话正字稿)
儥仈由底蜀年开始,蜀遘放假转故厝,都会有各种长辈开始关心我其人生大事(可以用白读 duai53-lai242):“着学校有无邀朋友啊(在学校有没有谈恋爱啊)?”“谈恋爱未啊(谈恋爱没啊)”?““介过两年会做新妇了啊(再过两年可以结婚啦)!”我故见觉自家故是蜀只伲囝哥,都是会这边感慨时间无等侬,我㑚是蜀只大学生也会变成乞长辈亲戚直头逐结婚其人,许边笑笑偌nuoh24,看无侬注意,赶紧使者话题遮过去。
着努力摆脱老一辈侬对感情经历过度关心其前后,我也生不蜀时发现,福州侬讲爱,实在是复委婉复丰富。
卜讲爱,就一定着讲遘“爱情”其议题。福州侬最稠使“邀朋友”来形容男女着[口礼]交往。虽然“谈恋爱”着口语裏势其使用频率bing55-luk5也真悬/也真稠有讲遘,前蜀芘讲法真像故是更有正正其福州味。
“邀”着福州话裏势有牵手其意思,两只有情人ing53手邀[口礼],就是恋爱,故此引申出谈恋爱其使法。真像每蜀只福州诸娘囝都有乞爸奶告诫过:“汝去邀朋友我无意见,但是伓通neoyng53去邀呆(坏)侬(你去谈恋爱我没意见,但是不要去跟坏人谈)。”嚽就是希望厝[口礼]诸娘囝着交朋友其前后着将共目睭拭光去,目睭看真去,触dooyk24着其都是好侬。仱“朋友”自然就是代表男朋友/女朋友了。无直接讲“恋人”luong55 ing53,大概也是蜀种委婉其表达。
㑚听见有侬讲“伊两只(他俩)日日晡行出(天天晚上出去)千一(他俩天天晚上出去‘千一’”,伓通误会nguo53-hui242,嚽伓是讲两只侬暝晡行出点钱,是解闷两只侬着[口礼]亲热。所谓“千一”,就是1100,福州话㑚按字读就是“幺幺环环”,共“邀邀环环”谐音;手共手牵着行出环街,自然就是恋爱了。
卜开始蜀段美妙其爱情故事,告白go55-beik5是绝对无能耐少其重要环节。 “我中意你”ngo13 zung55 i33 nei13伓啻单单广东话总款讲,使福州话告白 nguai33 dyng53-ei21 ny33 不是讲“喜欢”,蜀样着讲“中意”。蜀遘边兜其朋友开始暗恋对方复儥“得daik24”着其后,侬家这蜀阵理论悬顶其“恋爱大师 luong53-ai21 dai55-sy55”就会对手deoy53-iu33想办法:“㑚中意伊,汝着主动仂囝啊(如果喜欢ta,你要主动一点呀)!”
对并 deoy53-piang242俪na242,使“爱挃eoy55-lih5”来表达爱情,听过就更更朴素 pouk5-sou21、真实。这芘词本来其意思是卜挃buoh5-dik5、爱挃eoy55-lih5,仱着平常讲话前后也会掏来表示中意蜀只侬。“我野爱挃汝啊!”就满满都是对心上人sing53-suong242 ing53 其渴望 kak5-uong242共偏爱 pieng53-ai21。
除起直接其告白,福州侬对珍视 ding53-sei242其侬其喜爱,故囥着各种其爱称裏势。譬如讲,长辈对自家疼其细辈,稠稠会告伊“依命”“命囝”,共北京话裏势其“宝贝”、“乖乖”讲法儥蜀样,实际意思都是蜀样其。遘现在,我翁我妈ma33故会告我“命命”,虽然对蜀只成年其侬来讲真像有仂囝夸张,㑚是讲这蜀芘称呼裏势是伊各侬全部其爱意。因为着伊各侬目睭裏势,我仍原ing33-nguong53是未长大 mui21-duong55-duai242其伲囝哥。
有其地方,长辈会告厝[口礼]诸娘囝“妹囝 meing53-ngiang33、mei33/mei53-iang33”,或者直接着名字后斗带上“囝”,仱丈夫也会告老妈ma33“依妹”、“妹囝”。会使看出,表示“嫩”意思其“囝”,掏来称呼自家喜欢其侬或者动物其前后,就有亲热其感觉。
侬稠稠讲,中国侬透底都儥好意思表达爱,但是诗词裏势关于爱其意象也有千千万万。虽然侬家伓是野稠听见福州话裏势其“爱”,㑚是讲委婉其“邀朋友”、大胆其“中意”、夸张其“依命”,也全部都是福州侬心裏势真实其爱意。爱侬就像养花,我自然就是花师。希望侬家每蜀只侬都会感受、体验遘世界乞侬家其爱意,开出共别侬儥蜀样其美丽mi55-la242。