礼饼（正字稿）
放假放完转学校，共同学冇讲讲起中秋其事际，
“我故未食过五仁馅其中秋饼[口礼]。”我讲。
舍友野车疑，讲：“佪汝许边食其中秋饼都是世乇馅其？鲜肉其？”
我巴蜡头，讲：“伓是鲜肉，㑚是讲裏势也有肉；伓是五仁，仱也有仂囝像——侬家无告‘月饼’，告‘礼饼’。礼饼其外形共稠稠会看见其中秋饼野儥蜀样，皮尽薄，复酥复脆，做[口礼]金艳艳iang53-iang242，扁扁偌nuoh24，圆圆偌nuoh24，大概有两三公分厚，也有大其，也有嫩其，都儥蜀样。嫩其有蜀巴掌大，大其比面故[口礼]大。”我这边讲，许边手掏出比蜀比。
我最爱食礼饼其皮皮。饼其皮皮由粳米gang53-mi33、秫米、面粉抠蜀堆去捼nui53，慢慢烘heoyng55，慢慢烤koo21，徐仂滴 徐仂滴 sy21-nik5-deik24就会分出蜀层蜀层，配上外斗皮皮悬顶裹其芝麻，食过野酥野脆，蜀遘喙裏势就化去，甜味正好，复保留着馅其香味——礼饼其馅共五仁其馅基本差不多，主要是花生、芝麻总款其坚果，㑚是讲共白雪雪其猪油抠蜀堆，食过故软仂囝。另外，馅裏势故有“蜀红蜀绿”：红是“梅舌”，是梅掏糖共蜂蜜盐出去做其蜜饯，现时一般都是使菜头染红去，掏糖盐sieng21其，颜色是玫瑰其粉色，稠稠削碎以后加馅裏势；绿是“冬瓜糖”，也就是管瓜蜜饯，复甜复脆复爽口。总款蜀看，野価福州传统甜品其材料都着这块了，比喻讲“花生轧”（也就是花生共麦芽糖做成其蜀楞leing21蜀楞其糖）、“花生汤”裏势其花生，“麻芝”悬顶其芝麻，芋泥面[口礼]䆊ie242其梅舌，让侬蜀觑就会看出福州其味。
不过，㑚卜讲做礼饼第一[deik24]特别其材料，一定着讲遘肥肉。
听遘这所，室友惊[口礼]大告：“天地！甜其乇裏势故有肥肉啦？”
食肥肉这蜀件事际，我共舍友实在是尽怒nou242，㑚是讲礼饼裏势其肥肉就儥蜀样了，嚽是礼饼裏势馅其灵魂所在。肥肉削长长喏条，共馅抠蜀堆，再掏油裏势浸囇na242烤koo21囇，早都儥腻了，着软裏势复加仂囝爽脆，共冬瓜糖蜀堆，让馅其口感变密、变实了，当真是画龙点睛 ua55-lyng55 dieng21-zing55。
“不过，傒势汝各侬其中秋饼着告‘礼饼’哩？”舍友问。
“其实，礼饼蜀开始是掏送别侬其，有蜀句话号[口礼]‘礼饼正是礼，别乇儥算是礼’。可能是因为中秋节也着送，时间蜀长，慢慢就乞侬定义变成中秋饼了。”我回答讲。
有蜀回，厝[口礼]生不蜀时出现仂囝红红包装其礼饼，我做儥会意去：“故有几个a21月日正遘中秋节啊。”依妈解释讲，嚽是叔伯姐结婚，伊丈夫厝[口礼]送过来其饼，分侬家仂囝。
后尾我乍会仈，原来礼饼蜀开始是结婚使其。这蜀种传统遘现在故有保留：着结婚典礼之前，男方都会认真准备蜀份礼饼，新人就共这裏其礼饼分乞厝[口咧]侬共好朋友。为啰表达对新人新郎婿其感谢共祝福，收遘礼饼其侬都会多准备仂囝“添箱”（也就是女方厝[口咧]侬共好朋友送其祝贺礼品）送乞新人。
依妈削蜀楞礼饼乞我，我蜀喙咬落去，复酥复脆其皮皮共复甜复咸其馅着我喙[口礼]抠蜀堆，做蜀下 zo53-lo21-a242，我尽像透过这楞礼饼感受遘了新婚其喜庆共希望。
伓啻讨亲做新妇总款其“大日子”，着中秋总款其传统节日，也有送饼其习惯。福州有蜀句俗语话：“外妈ma33送外甥，依舅送外甥。”我故记[口礼]做细前后，外妈都会着送礼饼其前后笑笑偌nuoh24念这蜀句话。这所其“外甥”有两芘意思：头蜀芘是诸娘囝其伲囝哥，也就是“外甥孙”，第二芘正是依姐或者依妹其伲囝哥。每蜀年中秋，外妈都会为“外甥孙”准备蜀份礼饼，这份祝福一直会遘伲囝哥十六岁。㑚是外妈无能耐自家送上礼饼，就是依舅去送。不过，就算我已经十六岁了，许份满满都是外妈祝福共希望其礼饼，故是会年年都带[口礼]伊其笑面送遘我手[口礼]。
除起只裏，礼饼也会着老侬做寿其场合出现。其实，卜想分清楚礼饼使着底蜀种场合也儥困难——㑚使透过礼饼悬顶喜庆其红章，就讨母仈 to21-mo55-waik24了：结婚庆祝使“喜”，老侬做生日使“寿”，稠稠会看见其、通用其就是“福”，想过都是送礼品其侬真心其祝福。
着我老家连江，我许边将“礼饼”号“角饼”geoyk24-biang33，因为蜀楞大其礼饼稠稠,削变成野価楞分[口礼]食，每蜀楞都有蜀芘角角。削礼饼就像削卵糕，分享hung53-hyong33 其是团聚 tuang21-zeoy242其欢乐，跟[口礼]礼饼齐来其每蜀件喜事 每蜀芘节日，都有滋味 zy53-ei242 ，熟悉syk21-seik24 甜蜜 dieng55-mik5其印象，让侬想望无穷suong55 uong242 u33 gyng53。