雨（正字稿）
講遘福州其逿雨天，有儂會想起坊巷之間纷扬其雨丝，有儂會想起西湖上荡漾其涟漪，但是我想起其故是雨天臺中其生活奇異，比如講因爲逿雨天有前後緊張有是後舒暢其心情，故有伴着雨聲其榕城聲音……
福州儂會使“雨濛”来形容春天其雨，逿下其密密喏，榕城其𩄻𩄻喏。農歷三四月前後，雨㑚逿儥停其，窗帘、衣裳都是渍渍滥，長輩各儂都會唔嚕幾句“雨再逿下去，人都生殕啰。“
共“雨濛”相比，夏天其雷阵雨來其也快，逿其也透，讓大家儂都儥赴收衣裳了。“逿雨啰，逿雨啰，衣裳快快收起去。”做細時候，每蜀回聽見外斗有儂喊“逿雨吓，着收衣裳吓”，我都是褪跣骹，兩下七走陽臺𡅏，手凸々出去看四鞥内 當真逿雨了。我嬤哩跟𡅏我𩩍後，眉頭皺皺喏𡅏念：“嗨呀，天做变，蜀洗被单就逿雨，明明前蜀𣆯故是好天，这𣆯天卜乌暗了。”
“逿晡时”是福州儂對夏天半晡時候雷阵雨有其蜀種味躃講法。“晡时雨”來其更快，聲音也更霸，硬都有雷公跟𥍉线。出厝其時候，每蜀回逿晡時，媽媽就會徛喏一層踏斗向我懸頂大告“依妹吓，开始拍𥍉线了，汝会惊儥，电视着关去，雷公马上响了。”聽見媽媽其話，我㑚長臒臒喏電視截殆行下去，坐檐下聽儂碎喘。“今年暝野奇怪，都无做风台，热焙焙其。”“但是雨逿过価复惊做溪水吓。汝会记儥……”大儂各儂就總款搧𡅏蒲扇，趁天氣攀講遘别所事際了。
福州夏天其雨野価都共風颱有干過。福州話习惯將普通话其“臺風”反𡅏其講，號𡅏“風颱”。受遘季风气候影响，榕城百姓也想出了野価共風颱相關其谚语。臺中有蜀句“六月无风台，大雨无来路”，講其是农历六月左右㑚無風颱，雨水就會比較少了。“风台儥大，回南倒大”臺中其“回南”講其是風颱經過福州以後逿其“回南雨”。這句意思是風颱正來時候，儂家可能無見覺講其野霸，但是風颱經過以後，回南雨影響可能更大。所以，大家儂都希望“風颱尾抖蜀抖”。如果風颱會讓福州涼蜀涼，但是其影響也無講恰呆，回就是最好其風颱了。
敆我印象臺中，颱風卜遘其前後，天會變野豔光了。有時候是黃其，有時候是粉其。2005年，“龍王”卜遘其時候，天會變黃恰恰去。“卜做风台了，槛门囝关去！”儥仈底儂先告了句。厝𡅏大儂， 別乇事際也伓做了，都做好準備等風颱來。仱風拍仂𣆯，天烏暗下，此刻雨摒下。“回南三日雨去，这雨无停无歇啰，都无办法出去客佻……”做風颱時候，我㑚長定定覭厝𡅏，這時候下，依嬤就會乞我講笑了。
許乇年其“龍王”風颱讓我敆伲囝哥時候族會仈，風颱野霸野惡，破坏性野強。以後，未若𣆯，镇海楼重新起好了，仱哩，野価風颱当真伓趁福州行了， 嚽盡去巧合阿。但是，風颱無來，福州夏天其雨，也無舊底価去。所以，福州儂稠稠希望風颱來，講風颱以後其回南雨會讓福州涼仂囝。來來去去其雨水就總款牵动去大家儂其心。
嫩嫩雨囝，送來清凉，滋润万物，也讓蜀厝儂有能耐聚蜀堆食茶、攀講。現刻我去外斗讀書，每蜀回拍風逿雨，我就相遘舊底共蜀厝儂避雨其记忆，也會相遘潑遘雨水其鄉音。總款其想法讓我盡去安心。