水果摊（正字稿）
今年五六月，福州其雨逿𡅏是无停无歇，我就故㑚汉这蜀种转润天气会直头转润下去。敆厝𡅏卜生殕其我，蜀仂囝出门其想法都无。有蜀工，依嬷转其前后手𡅏掼𡅏满满蜀袋其桃囝，“恰生，故儥食其吓！”手故未凸出，我“食炮”心思就乞依嬷看透去，㑚长蒻兴其讲出蜀句半咸淡其福州话：“者桃……桃囝底所买其？”
“楼下依庆哥许所！”依嬷其声音由灶前传出。
哦，我心𡅏想夏天是真其遘了。
依庆哥是小区楼下水果摊老闆其名字，伊其水果摊就开敆侬家小区其门前口其“黄金地段”。福州其四季无世乇规律，有前后天凊热𡅏囫囵身搭汗，遘开春复凊𡅏抖抖战。但是每蜀芘季节，应季水果就野像手錶时间算好蜀样，如期敆水果摊悬顶出现。所以依庆哥水果摊悬顶其水果就变成我其“季节风向标”。
我故会记做细外妈教我福州话《果子歌》——“正月瓜子価人龃，二月白蔗甜粞粞，三月枇杷出好势……” 唱其就是福州四季水果其规律。
就掏嚽正遘夏天其福州来讲——《果子歌》有唱遘：“五月绛桃红复红”。讲其就是旧历五月前后桃囝宿去，正𡅏想依嬷会买桃囝转来。不过，嚽正上市其桃囝，故未遘伊第一好食其前后，现在故有仂囝青，故有仂囝涩，口味会参差仂囝；仱讲遘“六月荔枝挂灯笼……八月龙眼客佻侬。”龙眼、荔枝蜀上市就宣布六月大夏来了。福州故有蜀话熟语号“阿蛴叫，荔枝红”，讲其就是天热，阿蛦叫其前后正正好就是囫囵树荔枝宿其前后。福州侬对荔枝龙眼其品种也尽去讲究。爱食“蛀核荔枝，红核囝龙眼”，意思是讲嫩嫩核核其荔枝，共红色核核其龙眼都比较好食，肉复価复甜。
“七月番石榴摆上桌”，这所讲其番石榴复号𡅏“芭乐”，食起去软软𠲧，也是我去市场一定着买其“好乇”。福州民间传说：番石榴食恰価会“塞屎”。但是经过我这满価年试验，我感觉也无许满灵嘛。
遘秋天以后，天故未大凉，柿就已经上市了，就有“九月柿饼圆复甜”这蜀种讲法。柿饼就是曝焦以后其柿。讲遘柿，就让我想起外妈野稠挂敆喙边其——“耳聋听柿红”。这伓是讲耳会听出，柿宿其程度，是讲蜀只侬，耳儥好，将“耳聋”听去“柿红”。使总款误会来讲耳儥好，也是福州话让我感觉有味可爱其地方。
仱遘十月以后，水果摊就是“枹”其主场。福州话台中“枹”就是侬家讲其“柚子”，每蜀回，看见大粒、好看其枹总会引我行过去，蜀粒蜀粒掏起来，拍蜀拍，鼻蜀鼻枹其香味。
水果摊懸頂第一稠听见其福州腔调就是汝蜀句我蜀话其讲价：
“苹果蜀斤偌夥钱吓？”
“蜀斤五块。”
“这满贵，便宜仂囝蒋其？”
“野便宜了吓”
“两块有卖无？无卖我行去了！”
“哀吓， looyk24去，looyk24去，第一少四块，折本卖乞汝！”
熟语讲：“福州价，半半价。”意思就是讲做生意其侬会将价钱掏加倍，有经验其侬客第一少是对折填价。可能是因为有这蜀句话熟语敆𩩍后，老福州敆讲价其前后，声䛪也变𡅏特别大声，
依庆哥水果摊悬顶另外蜀芘特色，就是蜀块蜀块使塑料泡沫板做其价钱标签。泡沫板悬顶，除去价格，故会写𠲥水果其产地，“本洋龙眼”“琅岐葡萄”“永泰李囝”“闽清橄榄”“福清枇杷”……小小其水果摊就野像蜀芘福州五区八县其字典，四季水果使蜀种会看见会摸着其方法，敆告诉汝八闽大地其地理、气候、物产。