077 旺星人（正字稿）
正文
敆网友告犬囝号𡅏“修狗勾”其前后，福州侬大部分都讲“犬囝囝”。无赚，福州就是总款蜀座习惯敆平常交流台中将“狗”号𠲥“犬”其城市。嚽听𠲥野尽像古早其讲法。
其实，我自家就会惊犬囝，㑚长敆𠲥屏幕去感受犬囝有若伙臒。但是犬囝故是敆我做细其前后有野価欢喜其回忆。外公厝养蜀头哈巴犬，我告其“彬彬”，外公都是告其“犬囝”。彬彬爱敆犬宿裏势困困，平常野像连行路都野睶。无一定就是因为彬彬总款安静儥闹其癖意，我这儥惊犬囝都会共伊佮野好。
外公会仈我惊犬囝，去街中买菜其前后，碰着路边有摇头摆尾、跳悬跳下、踅来踅去其犬囝，伊都会共我讲：“伓使惊爱吠其犬囝。”因为福州熟语台中有蜀句讲“悻悻犬，咬死侬”。外公乞我解释，嚽是讲儥吠其犬囝单倒更恶。
嘻前后，外妈也是稠稠乞侬家伲囝哥囝屈𠲥念“犬咬懒卤侬”，教侬家日日一定衣裳着颂平直去，伓通做滥𡞟其伲囝，总款路边其犬囝也儥乱吠。不过也是因为这蜀句话，大以后我每蜀回颂破空其牛仔裤出门，看见路边其犬囝，都躃远远喏，都㑚惊乞犬囝认成“懒卤侬”去。
外公厝我是每蜀年暑假都着去其。热天前后，泅水是第一好其去暑其选择。外公、依舅共表弟趁做细开始都是敆十八溪旁边生活，泅水都泅野好。共伊各侬比，依爸其泅水技术就无蒋好。伊粉款使力其泅法都乞依嬷解闷号𠲥“犬头泅”，就是讲野像犬囝其泅法。但是对我总款㑚会仈抱泼𠲥浮𤃶、儥仈泅其侬来讲，㑚挃会泅“犬头泅”，我也尽满意了。
除开泅水，拾梨食梨也是我暑假生活台中印象比较深其蜀芘回忆。外公厝门口有蜀蔸两层楼悬其棠梨树。因为开花比较迟，每蜀年暑假卜结束其前后，果子正会宿。有时敆热天下昼逿蜀场暴雨，梨就乞雨拍逿遘地兜。雨停以后，外公就带侬家去拾梨。梨也伓是都是复甜汁汁复価其，也有食遘喙𠲥复酸复涩其，大侬就会唔噜蜀句：“共犬头梨差儥狠。”做细其前后我都是野奇怪，傒势儥好食其梨会号𠲥“犬头梨”，傒势伓是“牛头梨”或者“马头梨”？敆福州，犬囝会乞“酸涩”联系敆蜀麇，这蜀芘问题，遘现在我都无寻着答案。
我想囇，嚽大概是因为，敆中国传统文化台中，“犬”野稠是负面其形像出现，敆福州话裏势也是总款。
岁数比较大其福州侬也尽稠讲总款其熟语：“容猫上灶，容囝不孝，容犬乱斗，容鸡屎着扫”，故有“䁐门逐犬拍乞食”，㑚伲囝哥病去闹号𠲥“做犬”，啼嘛声音野大号𠲥“［犭音］［犭音］叫”，碰着事际野慌慞其侬号𠲥“慌慞犬”。总款其熟语也都有几分批评其意思。
但是，福州其实是对犬比较友好其地方。福州侬也爱讲“猫投穷，犬投富”，养犬说明家庭条件比较好。无管是敆农村故是敆城区，犬囝敆野価侬厝𠲥都看野重，共蜀厝侬蜀样。敆侬家厝𡅏，蜀看见喙舌凸々𡅏，尾尾摇𠲥其犬囝囝，对刁皮伲囝哥囝都野严肃其外公，此刻就变野好疼去。敆福州其千家万户其厝裏势，有犬囝敆𡅏躃来躃去，就野像厝瓦顶有炊烟慢慢升悬去，感觉野亲房野热落。