hf不分（正字稿）
前蜀段共蜀伊只野[日行]无看见氐其朋友约好，正正好五一放假各侬都有闲，行出去聚餐，好好若食蜀顿。伊是蜀只土生土长其福州侬，蜀开喙讲普通话哩，就福州腔野重。比喻讲“飞机”会讲𠲥“灰机”，“恭喜发财”会讲𠲥“恭喜花财”。
所以每蜀回触着伊“f”“h”分儥清楚前后。我都着解闷伊几句，侬本来讲“恭熹发财”是趁钱吓，汝讲𠲥会变“恭喜花财”𠲥去，這樣款其祝福，我故透底无听着。伊应我“汝会仈世乇。我这口音在‘胡’建可是大有用处。”我也无悗应伊“汝就无悗讲嘛，安图生都无汝会仈编故事。”这蜀回聚餐，蜀见面我就解闷伊吓。我讲“恭喜花财啊，今天这顿你请客！”伊也尽干脆，伊讲“我请就我请，行！”
老朋友聚会，蜀边讲蜀边食，尽舒畅。心情蜀好哩，胃口也变好去，我就讲“老板娘，帮我加碗饭。”两年无看见伊，伊变化尽大，最关键其是伊饭量也变大去。仂久哩伊就叫服务员行过来讲“来碗‘换’。”正正好服务员共空碗掏去行厨房𠲥。我就问伊“你怎么发‘f’的音这么烫嘴？”伊野认真想蜀想共我讲“主要是福州话里没有‘f’的音啊，受方言影响，发‘f’的音就会比较烫嘴，所以其实我不是完全‘f’‘h’不‘昏’啦。”我想蜀想伊讲其也正是。普通话台中其，“f”敆福州话台中着读“h”，也有时候着读“b”，甚至也有时候读“p”。反正透底哩就是无读“f”其。看伊这满认真解释，故是乞“分”读𡅏“昏”，实在是见觉野好笑。
过仂久哩，许只服务员掏蜀𡅏空碗过来，裏势蜀粒饭都无。我两只会凝蜀下，仱复大笑，这只服务员哩肯定伓是福州侬，伊㑚听见哩我朋友讲“换”以为呢是叫他换一个碗。
看见侬家两只大笑哩，这只服务员有仂囝儥会意去。正正好哩老板嫂也注意过来，我朋友哩共老板嫂讲“来碗‘换’。”老板嫂哩是正规其福州侬吓，无仂久着掏蜀碗饭过来了，饭悬顶故沃蜀瓢肉汁。我蜀看“哎呀，都是加蜀碗饭，傒势伊待遇就比我好哩？”饭食完以后行出来，我就问伊干乜势吓。伊故笑笑仂乞我讲“汝复伓是讲我是安图生编故事？”伊继续讲“老板娘特别照顾本地人，至于你虽然是福州人，但是说话没有‘胡’州的灵魂，所以老板娘也听不出来你是福州人。”伊这样讲我都儥仈将样应去，伊故补充讲，伊敆闽南地區上大学，野価闽南侬哩讲普通話也是“f”“h”分儥清楚，伊学校食堂贮饭其依姐哩听见伊讲话其腔，都会照顾，多贮仂囝乞伊。
遘厝以后哩，我倒沙发𡅏仂想这事际。确实无想遘“f”“h”分儥清楚，故有总款其好处。见觉我自家做蜀只正规其福州侬哩，也野像无享受到遘这款其好处。想起哩之前野価侬参加其蜀芘挑战,复快复准其读出来“防护服”这三字。当时哩拖我厝其几只侬齐来试蜀试，结果哩无蜀只会读其准其，读世乇其都有“黄护服”“防护胡”“黄呼呼”…。倒沙发其我自家也无悗试蜀试，“防护服……伓是，黄护服，防……呼呼……”