福州话中的“依”（正字稿）
有蜀回吓，放假时候去泉州客佻。敆玩街其时候看见狠価店其名字吓，都是蜀种样式其。读起去有仂囝奇怪，世乇“爱啊石花膏”、“文啊珠宝铺”、“燕啊麻辣灴”。嚽就告我看儥会意了。譬如讲这芘“爱啊石花膏”是想表达我野喜欢石花膏其意思伓是？使这蜀芘做店其名字吓，故狠有味。但是珠宝铺麻辣灴，嚽蒋解释𠲥？敆玩街时候故多看几芘店其名字野像讨着仂囝规律。仱就乞我闽南其舍友发消息。汝闽南话裏势告熟其侬。安是会告世乇世乇啊？
舍友讲无赚。仱复乞我讲：“譬如讲我厝其侬告我啊，都是告‘萍啊’，我爸告伊其朋友就是告‘肥啊’。”我想过想通去，所以讲这芘“世乇世乇啊”都乞侬家福州侬讲其“依世乇世乇”蜀样嘛。总款想过就好理解了，街𠲥看见其“爱啊石花膏”“燕啊麻辣灴”是伓是就是侬家福州蜀街都会看见其“依土捞化”“依强扁肉拌面”蜀样嘛。总款蜀想也有仂囝道理吓，每芘地方其方言都儥蜀样，告名字其习惯当然也儥蜀样啰。
依介加上姓或者侬名字第一后蜀字是福州第一经典其蜀种告法。两芘字蜀组合告出就野亲切；依婷、依林、依明、依珠，蜀听过就是福州其丈夫囝诸娘囝。写乞福州侬有关系其文章吓如果文台中其名字是依世乇世乇总款蜀读过去就有仂囝虾油味。语气吓如果介亲密仂囝，会使敆尾斗加上“哥、姐”，“依明哥”“依珠姐”，或者干脆连“依”都省去，明哥珠妹。总款告去吓仂囝都儥输吴侬软语。故有依敆上形容词也是蜀种告法，就像蜀种外号表达亲密或者做畅其意思就像“依肥”。故有笑侬歞其“依慒”“依土”“依闷”也是总款依加形容词其告法。当然正开始学福州话其侬也着注意吓，如果伓是野亲密其侬做畅，㑚随便碰着蜀只侬就告伊“依肥”“依闷”总款会让侬感觉儥尊重侬。无一定会引起冤家或者相拍。
故有蜀芘野稠看见“依”其时候就是亲戚台中其称谓，告亲戚其时候野稠敆原来其称谓悬顶介加上蜀芘“依”字。“依爸”“依嬷”“依哥”都是口语其讲法，福州侬厝台中故野稠有蜀种小名其告法。以“弟”“妹”告厝台中其晚辈。前斗也习惯加上“依”或者“阿”。故有哩会敆尾斗加上福州话裏势野经常使遘“囝”字讲成“依妹囝”“阿弟囝”。但是双字其称谓吓，介加上弟、妹、囝有两种情况。譬如讲依明弟可能是告依明，或者是告依明其伊娘弟。嚽着结合具体情况来区别。悬顶其“依“吓也有表达亲密其意思，也有时候也会使表达尊重。就像告儥熟其老侬，会使告依伯依姆。行出路儥仈行问别侬时候，蜀声“依哥”“依姐”也让侬感觉喙野甜。称谓表达尊重其故有蜀芘办法是依世乇世乇师，台中其世乇会使替成这只侬名字台中其蜀芘字。譬如讲真鸟囝群裏势侬家都是告领头其郑天镭号“依镭师”。这蜀芘听起有仂囝古风其福州讲法。像去侬家这蜀圈后生囝其蜀种语言COSPLAY。有去互相拱手其做畅其意思。语言嘛，差不多就是总款侬悗使伊悗变化，会演变出野価新其意思。就是敆总款其动态台中伊正有办法一直年轻有生命力。